Enxienplo de lo que conteçió a don Pitas Payas, pintor de Bretañia
¶"Del que olvido la muger te diré la fazaña,
si vieres que es burla dime otra tan mañana;
era don Pitas Payas, un pintor de Bretaña,
casóse con muger moça, pagávase de conpaña.
¶"Ante del mes conplido, dixo él, 'Nuestra dona,
yo volo ir a Frandes, portaré muita dona.'
Ella diz, 'Monseñer, andat en ora bona,
non olvidedes vuestra vasa nin la mi persona.'
¶"Dixo don Pitas Payas, 'dona de fermosura,
yo volo fazer en vos una bona figura;
por que seades guardada de toda altra locura.'
Ella diz, 'Monssener, fazet vuestra mesura.'
¶"Pintó'l so el onbligo un pequeño cordero
fuese don Pitas Payas a ser novo mercadero;
tardó allá dos años mucho fue tardinero,
fazíasele a la dona un mes año entero.
¶"Commo era la moça nuevamente casada
avie con su marido fecha poca morada;
tomó un entendedor e pobló la posada;
desfizo se el cordero que dél non finca nada.
¶"Quando ella oyó que venía el pintor
mucho de priesa enbió por el entendedor ;
dixo le que le pintase commo podiese mejor
en aquel logar mesmo un cordero menor.
¶"Pintóle con la grand priesa un eguado carnero,
conplido de cabeça con todo su apero;
luego en ese día vino el mensajero,
que ya don Pitas Payas desta venía çertero.
¶"Quando fue el pintor de Frandes venido,
fue de la su muger con desdén resçebido;
desque en el palaçio con ella estudo,
la señal quél feziera non la echó en olvido.
¶"Dixo don Pitas Payas, 'Madona si voz plaz,
mostrat me la figura e ajan buen solaz.'
Diz la muger, 'monseñer vos mesmo la catat,
sey ahí ardidamente, todo lo que vollaz.'
¶"Cató don Pitas Payas el sobredicho lugar,
e vido un grand carnero con armas de prestar.
'¿Cómo es esto, Madona? o ¿cómo pode estar?,
que yo pinté corder, e trobo este manjar.'
¶"Commo en este fecho es sienpre la muger
sotil e mal sabida, diz, '¿cómo monsseñer?
¿En dos años petid corder non se fazer carner?
Vos veniesedes tenplano e trobariades corder.'
¶"Por ende te castiga non dexes lo que pides,
non seas Pitas Payas para otro no errides;
con dezires fermosos a la muger conbides,
desque te lo prometa, guarda non lo olvides.
¶"Pedro levanta la liebre e la mueve del covil,
non la sigue nin la toma, faze commo cazador vil.
Otro Pedro que la sigue e la corre más sotil,
toma la esto contesçe, a caçadores mil.
¶"Diz la muger entre dientes, 'otro Pedro es aqueste,
más garçon e más ardit, quél primero que ameste,
el primero apost deste non vale más que un feste;
con aqueste e por este faré yo si Dios me preste.'
¶"Otrosí quando vieres a quien usa con ella,
quier sea suyo o non fáblale por amor d'ella;
si podieres, da'l algo, non le ayas querella,
ca estas cosas pueden a la muger traella.
¶"Por poquilla cosa del tu aver quel dieres,
servirte ha lealmente fará lo que quisieres;
fará por los dineros todo quanto le pidieres,
que mucho o poco dal cada que podieres.